Að loknum landsfundi Samfylkingarinnar

Landsþing 60+ lýsir þeim vilja sínum, að í áföngum verði afnumin skerðing tryggingabóta almannatrygginga vegna greiðslna úr lífeyrissjóðum. Fundurinn er þeirrar skoðunar, að greiðslur úr lífeyrissjóðum til lífeyrisþega eigi að vera viðbót við lífeyri frá almannatryggingum.

Landsþing 60+ hvetur til sameiningar og fækkunar lífeyrissjóða og aðgerða til að samræma réttindi sjóðfélaga.

Landsþingi 60+ leggur á það áherslu, að bætur almannatrygginga fylgi þeim breytingum, sem verða á launum í almennum kjarasamningum.

Bent skal á að mikil óánægja kom fram um lokun líknardeildar á Landakoti og samþykkt ályktun um þá framkvæmd.

Undirritaður lét einnig koma fram á landsfundinum eftirfarandi skoðanir sínar.

Mesta niðurrifssstarfsemi hér á landi í íslenskri heilbrigðisþjónustu er lokun St. Jósefsspítala í Hafnarfirði eftir 80 ára frábært starf spítalans.

Hvernig staðið var að þessari lokun er hreint með ólíkindum. Komið var á St. Jósefsspítala. Allt merkt LSH, tæki og tól hirt, lá við að starfsfólk væri afklætt til að merkja LSH, svo mikið gekk á.

Gjafir frá ýmsum klúbbum úr Hafnarfirði, tæki og tól, málverk hirt, eftir stóð starfsfólk hálfgrátandi yfir vinnubrögðum starfsfólks LSH eða fulltrúa hans, við þá framkvæmd að taka yfir St. Jósefsspítala. Þar var einnig verið að svíkja loforð við Hafnfirðinga um að svona lokun myndi aldrei eiga sér stað.

Ekki hefur verið sýnt fram á hagræðingu við þessa lokun.

En það er virðulegur velferðarráðherra, jafnaðarmaðurinn Guðbjartur Hannesson, sem ábyrgð ber á þessari framkvæmd.

Einnig skal þess getið að undirritaður lýsti yfir mótmælum sínum um að verðtrygging yrði tekin af, við verðum að vernda okkar lífeyrissjóði og réttindi.

Ég tel að virðisaukaskattur á lyfjum ætti hiklaust að lækka, er 25,5% á meðan ýmsar heilsuspillandi vörur eru með allt niður í rúmlega 7% virðisaukaskatt.

Þessi breyting kæmi ungu fólki og eldri borgurum hiklaust til bóta.

Nóg að sinni.