Framtíð ferðamála á Íslandi til umræðu

Gera má ráð fyrir fjölgun ferðamanna til Íslands sem nemur hundruðum þúsunda ef aðstæður verða líkar því sem er í dag á næstu árum. Ekki er augljóst hvaða skipulag verður haft við að taka á móti fjölgun í svo miklum mæli, ekkert hefur heyrst um það.

Það er augljóst að það þarf að fjárfesta í ferðaþjónustu eins og um stóriðju sé að ræða enda eru miklir tekjumöguleikar í greininni. Vekja þarf upp fjárfesta.

En augljóst er að það þarf skipulag svo ekki verði öngþveiti við svokallaðar náttúruperlur eins og Gullfoss og Geysi og álíka staði sem gætu legið undir skemmdum ef ekki er takmarkaður aðgangur á álagstímum. Það þarf auðvitað að vera í lagi með snyrtingu og fleira. Það liggur fyrir að það þarf að takmarka aðgang á staðina á dag.

Íbúar á Havaí eru 1.300.000 en ferðamenn 7.6 milljónir. Sama hlutfall á Íslandi væru tæp 1.800.000. Eitt er að það væri hægt að fjölga viðkomustöðum ferðamanna með manngerðum stöðum. Ég hef hugsað mikið um af hverju heita vatnið er ekki notað meira til að draga ferðamenn til landsins eins og til dæmis með svokölluðum vatnagörðum (water park).Með því að gera það væri hægt að koma á skipulagi á aðkomu ferðamanna á þessar náttúruperlur okkar. Gríðarlega mikið af heitu vatni rennur út í náttúruna án þess að það sé notað nema að litlu leyti, sérstaklega er það á Suðurlandi. Mín hugmynd er að byggðar verði ferðamannamiðstöðvar í kringum heita vatnið sem mætti kalla Vatnagarða eins og er í útlöndum. Þessir garðar væru með gistingu fyrir mikinn fjölda eða 2.000-3.000 manns hver sem dveldu þar mislangan tíma og nytu heita vatnsins sem heilsutengdrar þjónustu. Opið allt árið. Náttúrulegast er að gisting sé í litlum timburhúsum.

Ein svona miðstöð ætti að geta tekið á móti um 40.000 ferðamönnum á ári þegar allt er komið í gang. Þetta er hugsað sem viðbót við hótelin í Reykjavík. Í kringum þessa vatnagarða hefðu þjónustuaðilar aðstöðu sem byði upp á ferðir til okkar vinsælustu náttúruperlna og s.s. hestaferðir, jöklaferðir og fleira. Ferðaskrifstofur sæju um að bóka á þessar miðstöðvar ásamt fleirum. Ýmis þjónusta þyrfti að vera til dægrastyttingar og heilsuræktar og önnur þjónusta eins og hárgreiðslustofur, nudd og fleira sem áhugavert er að bjóða upp á, einnig verslanir ýmiss konar. Sem sagt mikil atvinna. Þetta er hugmynd til umræðu.