Ljósleiðaravæðingin vekur athygli ytra

Mikill áhugi er á uppbyggingu ljósleiðaranets Gagnaveitu Reykjavíkur, dótturfélags Orkuveitunnar, í öðrum löndum. „Margir vilja heyra um ljósleiðaravæðinguna í Reykjavík. Ástæðan er sú að þótt við séum fá og með smærra umfang en víða annars staðar þá höfum við unnið eftir plani sem gengur upp,“ segir Birgir Rafn Þráinsson, framkvæmdastjóri Gagnaveitunnar.

Hann hélt erindi á stærstu ráðstefnu í heimi um ljósleiðaravæðingu í Mílanó á Ítalíu í febrúar og endurtekur leikinn á ráðstefnu póst- og fjarskiptastofnunar Grikklands í næsta mánuði.

Birgir segir horft til ljósleiðaravæðingar í Evrópu á næstu árum. Hún sé komin þar mislangt á veg. Þar eru fremst í flokki auk Íslands Noregur, Svíþjóð og Holland. Lengst er ljósleiðaravæðing heimilanna komin í Kóreu og Japan.

Gagnagveitan hefur tengt um 2/3 hluta af heimilum í Reykjavík, auk allra heimila á Akranesi, Seltjarnarnesi, Hellu og Hvolsvelli. Þetta jafngildir 58 prósentum þeirra 65 þúsund heimila sem stefnt er að verði tengd ljósleiðaranetinu í árslok 2014. Viðskiptavinir eru nú tólf þúsund talsins og bætast um fjögur hundruð við í hverjum mánuði.

Birgir segir íbúa höfuðborgarsvæðisins taka vel í það þegar spurt sé hvort þeir hafi áhuga á að fá ljósleiðaratengingu í hverfi sitt. Flestir taki á endanum allan pakkann, tengingu fyrir síma, sjónvarp og net. „Það sýnir að almenningur gerir sér grein fyrir að því ljósleiðaranetið sé framtíðarlausn fjarskipta fyrir heimiln,” segir hann.

Ljósleiðaranet Gagnaveitunnar er farið að skila umtalsverðum tekjum. Þær námu einum milljarði króna í fyrra samanborið við undir átta hundruð milljónir í hittifyrra. Eignir nema tíu milljörðum króna en skuldir 7,2 milljörðum. Þar af eru 6,2 milljarðar gagnvart móðurfélaginu, Orkuveitu Reykjavíkur. Lánið er á gjalddaga á næsta ári. Birgir segist vongóður um að þetta eina lán verði framlengt. Önnur verði hins vegar endurfjármögnuð á almennum lánsfjármarkaði.