Yfirvofandi skortur í málmiðnaðinum

Skortur á íslenskum málmiðnaðarmönnum er yfirvofandi hér á landi á næstu árum. Gífurleg afturför hefur orðið í menntun í greininni, að mati Guðmundar Ragnarssonar, formanns Félags vélstjóra og málmtæknimanna.

Guðmundur segir atvinnuleysi meðal starfsstéttarinnar hlutfallslega sama og ekkert og ef einhverjar af þeim stóru framkvæmdum sem liggja í kortunum fari af stað á næstunni, verði hér verulegur skortur á málmiðnaðarmönnum.

„Það liggur ljóst fyrir að ef farið verður af stað með stækkun á álverinu eða áframhaldandi vinnu við virkjanir, þá verða erlendir vélvirkjar og málmiðnaðarmenn fluttir til landsins til að sinna verkunum,“ segir Guðmundur. „Ef við menntum ekki fleira fólk á næstu fimm til sjö árum, þá förum við að nálgast þann tímapunkt að það verður ekki til mannskapur til að sinna þessum verkum.“

Eftir efnahagshrunið var nokkuð mikið um það að íslenskir málmiðnaðarmenn fluttu til útlanda, flestir til Noregs, þar sem launin voru oft á tíðum meira en helmingi hærri. Guðmundur segir að nauðsynlegt sé að bæta kjör málmiðnaðarmanna hér á landi til þess að halda starfsstéttinni gangandi. Útseld vinna í smiðjunum sé allt of lágt verðlögð.

„Kjörin þurfa að batna,“ segir hann. „Í dag þurfa fyrirtæki að skipuleggja viðhaldsverkefni með margra mánaða fyrirvara til þess að tryggja að smiðjur hafi nægan mannskap til að fara í verkin.“

Að mati Guðmundar er nauðsynlegt að koma sterkum boðskap til samfélagsins og stjórnvalda til þess að bæta aðstæður málmiðnaðarmanna hér á landi og laða fólk að greininni.

Nokkur fjöldi íslenskra málmiðnaðarmanna býr og starfar í útlöndum í dag, eða 545 manns. Af þeim er ein kona, búsett á Ítalíu.

Alls hafa 9.166 manns tekið próf í málmiðngreinum frá því iðnaðarráðuneytið hóf skráningu á prófunum. Þar af eru eftirlifandi 8.280 einstaklingar og um 7.735 búa hérlendis, eða um 90 prósent. Af þeim eru 37 konur, sem gerir 0,4 prósent af heildarfjöldanum.

sunna@frettabladid.is