"Delete að lestri loknum“

Forstjóri Greiðslumiðlunar VISA-Ísland fór fram á það við bankastjóra Landsbanka Íslands að bankinn aðstoðaði við að beita stóra viðskiptavini VISA þrýstingi til að þeir samþykktu hærri gjöld frá kortafyrirtækinu.

Samskiptin áttu sér stað í tölvupósti í ársbyrjun 2005. Bankastjórinn var Halldór J. Kristjánsson og forstjórinn Halldór Guðbjarnason. Bankastjóri Landsbankans var einnig stjórnarformaður Greiðslumiðlunar.

Tölvupósturinn er meðal gagna sem Samkeppniseftirlitið lagði hald á í rannsókn á ólögmætu samráði Greiðslumiðlunar hf., Kreditkorts hf. (Europay) og Fjölgreiðslumiðlunar hf. til að klekkja á nýjum keppninauti á markaði kortaviðskipta PBS/Kortaþjónustunni.

Rannsókninni lauk með sátt í janúar 2008, tveimur árum eftir að Kortaþjónustan lagði fram kæru sína, þar sem fyrirtækin þrjú játuðu á sig brot og féllust á að greiða samtals 735 milljónir króna í stjórnvaldssekt.

Úrskurðarnefnd samkeppnismála féllst í fyrrahaust á beiðni Kortaþjónustunnar um að fá afhent gögnin sem ákvörðun Samkeppniseftirlitsins árið 2008 byggði á. Valitor (áður Greiðslumiðlun) hafði kært til úrskurðarnefndarinnar.

„Ég mun kurteislega tilk. Ragnari [Önundarsyni, þá forstjóra Kreditkorts hf.] á eftir að við ætlum að hefja kaup á Raðgreiðslusamningum og væntum þess að hann standi ekki á móti því að við kaupum Kreditkortasamninga eins og þeir hafa getað keypt VISAsamninga," skrifar Halldór nafna sínum í Landsbankanum í fyrrnefndum tölvupósti. „PBS [Kortaþjónustan] hóf herferð í nóv. sl. til að reyna að auka viðskiptin. Eitthvað hefur þeim orðið ágengt svo við verðum eina ferðina enn að fara í átak gegn þeim."

Forstjóri VISA-Ísland nefnir í póstinum ÁTVR og Haga sem fyrirtæki sem greitt hafi lægst gjöld, en eigi að reyna að fá til að samþykkja hækkun. „Má vera að við þyrftum einhverja aðstoð frá ykkur, viðskiptabanka Haga." Hagar voru þá, líkt og nú, einn stærsti eigandi matvöruverslana í landinu og ÁTVR í ríkiseigu.

Í gögnum Samkeppniseftirlitsins er fjöldi tölvupósta. Margir eru á milli Halldórs Guðbjarnasonar og Ragnars Önundarsonar. Þá má sjá hvernig Logi Ragnarsson, forstjóri Fjölgreiðslumiðlunarinnar (sem frá og með síðustu áramótum varð að fullu í eigu Seðlabankans og nefnist nú Greiðsluveitan) áframsendi í nóvember 2002 erindi Jóhannesar I. Kolbeinssonar, forstjóra Kortaþjónustunnar, beint á Halldór Guðbjarnason, Ragnar Önundarson og fleiri starfsmenn fyrirtækja þeirra. Með þessari sendingu fréttu kortafyrirtækin tvö af innkomu Kortaþjónustunnar á markaðinn og hófu smíð sérreglna um íslenska markaðinn til að torvelda Kortaþjónustunni að hefja hér viðskipti.

Til stendur að birta öll gögnin á vefnum Kortasamráð.is, en hann er í eigu Kortaþjónustunnar. Fyrirtækið hefur höfðað einkamál á hendur Valitor, Borgun og Greiðsluveitunni.

Logi Ragnarsson gegnir enn þá starfi forstjóra Greiðsluveitunnar. Við starfi forstjóra Kreditkorta (nú Borgunar) tók Haukur Oddsson, en Ragnar er varaformaður Lífeyrissjóðs verslunarmanna og varaformaður Framtakssjóðs Íslands. Höskuldur Ólafsson, nú forstjóri Arion banka, tók við af Halldóri sem forstjóri VISA-Ísland (nú Valitor).

olikr@frettabladid.is