Skiptastjóri Capacent vill lögreglurannsókn

Skiptastjóri félagsins GH1, sem áður hét Capacent, hefur farið fram á að efnahagsbrotadeild ríkislögreglustjóra rannsaki kaup á rekstri Capacent á Íslandi. Þykir leika grunur á að veðsettar eignir hafi verið seldar án heimildar veðsala. Þessu vísa forsvarsmenn Capacent alfarið á bug og íhuga meiðyrðamál gegn skiptastjóranum.

Félag í eigu starfsmanna keypti í september rekstur og vörumerki Capacent í kjölfar þess að ekki tókst að semja um niðurfellingu á erlendu láni sem hvíldi á fyrirtækinu.

Skiptastjóri eldra félagsins, Guðrún Helga Brynleifsdóttir, lýsti í nóvember yfir riftun á kaupunum og fór í lögbannsmál vegna notkunar á vörumerkjum félagins. Þeirri kröfu var hafnað í desember á þeim forsendum að kaupsamningurinn væri gildur. Enn hefur þó ekki fengist botn í aðfarargerð sem lögð var fram á sama tíma. Guðrún Helga segir að beðið sé niðurstöðu í því máli áður en riftunarstefnu verði þinglýst.

Capacent sendi út tilkynningu um málið í nóvember. Þar segir að rétt hafi verið staðið að kaupunum og verðið hafi endurspeglað verðmæti hins keypta. Þá hafi þess verið sérstaklega gætt að ekki fylgdu veðsettar eignir. Með kaupunum hafi starfsmennirnir sýnt ábyrgð, því ef ekki hefði komið til kaupanna hefði rekstur Capacent stöðvast og um 90 starfsmenn misst vinnu sína.

Haft var eftir Guðrúnu Helgu í Morgunblaðinu hinn 19. nóvember síðastliðinn að fjármunir veðsettir Íslandsbanka hefðu verið notaðir til að gera upp við aðra kröfuhafa þegar gengið hefði verið frá kaupunum. Stjórnendur Capacent hafna því hins vegar og segjast íhuga meiðyrðamál vegna ummælanna. Um mjög alvarlegar ásakanir sé að ræða sem geti valdið fyrirtækinu miklum skaða.- mþl