Líklega farið fram á gæsluvarðhald síðar í dag

Lögreglan á höfuðborgarsvæðinu mun líklega fara fram á gæsluvarðhald síðar í dag yfir 25 ára gömlum manni sem játaði í gær að hafa banað barnsmóður sinni.

Samkvæmt upplýsingum frá lögreglunni stóðu yfirheyrslur yfir í gærkvöldi og fram á nótt. Lögreglan vill ekki gefa frekari upplýsingar um málið að svo stöddu.

Maðurinn kom akandi að Landspítalanum í Fossvogi á áttunda tímanum í gær með lík hennar í skotti bíls síns og vísaði starfsfólki spítalans á líkið. Starfsfólkið hafði samband við lögreglu og var mikill viðbúnaður á bílastæði Landspítalans í gærkvöldi. Ekki liggur fyrir hvernig andlát hennar bar að. Maðurinn og stúlkan áttu saman tveggja ára son.