Neytendastofa sektar 15 verslanir vegna verðmerkinga

Neytendastofa hefur sektað 15 verslanir í Smáralind og Kringlunni. Þetta er gert í framhaldi af könnun Neytendastofu á ástandi verðmerkinga hjá verslunum í Kringlunni og Smáralind.

Fjallað er um málið á vefsíðu Neytendastofu. Þar segir að margar af þeim verslunum sem gerðar voru athugasemdir við bættu merkingar sínar en nokkrar þeirra fóru ekki að tilmælum Neytendastofu. Því hefur Neytendastofa nú sektað þær fyrir ófullnægjandi verðmerkingar.

Verslunum ber skylda til að verðmerkja allar söluvörur sínar, jafnt í verslun sem og í sýningargluggum sínum.

Í Smáralind var ástandi verðmerkinga ábótavant í tveimur verslunum og í 13 verslunum í Kringlunni. Ýmist voru söluvörur í verslunum eða í búðargluggum verslana óverðmerktar. Í nokkrum verslunum voru bæði söluvörur í verslun og búðarglugga óverðmerktar.

Verslununum var öllum gefinn kostur á að koma verðmerkingum sínum í lag. Þar sem þær fóru ekki að tilmælum Neytendastofu hefur stofnunin lagt á þær stjórnvaldssektir allt frá 50.000 kr. til 200.000 kr.