Tilkynnt um söluna til kanadísku kauphallarinnar

Tilkynnt hefur verið um sölu Icelandic Group á bandarískum eignum félagsins fyrir til kanadísku kauphallarinnar, en kaupandinn, Hight Liner Foods, er skráður á markað þar í landi. Greint var frá viðskiptunum á Vísi fyrr í dag. Framtakssjóður Íslands er eigandi 81% hlutafjár Icelandic Group.

Samkvæmt High Liner Foods nemur heildarvirði samningsins 230,6 milljónum dollara, eða sem nemur 27 milljörðum króna. Haft er eftir Henry Demone, forstjóra High Liner, að kaupin séu ánægjuleg fyrir félagið og styrki það verulega á markaði í Bandaríkjunum. Stjórnendateymi Icelandic í Bandaríkjunum sé framúrskarandi. Þá kemur einnig fram að áfram verði unnið með íslenskum framleiðendum, enda skipti það fyrirtækið í Bandaríkjunum sköpum.

RBC Capital Markets og íslenska ráðgjafafyrirtækið Markó Partners voru High Liner til ráðgjafar í viðskiptunum, að því er fram kemur í tilkynningunni.