Umtalsverðar hækkanir á matvöruverði milli ára

Sú matvara sem verðlagseftirlit ASÍ kannaði verð á þann 8. nóvember sl. hefur hækkað umtalsvert í verði frá sambærilegri könnun sem gerð var fyrir 14 mánuðum í lágvöruverðs verslununum Bónuss, Nettó og Krónunni. Áberandi eru miklar hækkanir á kjötvörum 8-45% og kaffi um 15-38%. Ostur, viðbit og mjólkurvörur hafa hækkað um 5-18% á þessu rúma ári. Verðbólga á tímabilinu var 6%.

Í tilkynningu segir að vinsæl vara eins og skyr.is með bláberjabragði hefur hækkað um 7% í öllum þremur verslununum og hreint KEA skyr hefur hækkað um 16% í Nettó og 18% í Krónunni og Bónus.

Flestar vörurnar sem skoðaðar voru í báðum könnunum hafa hækkað í verði. Sem dæmi um miklar hækkanir á vinsælli matvöru má nefna frosið lambalæri sem hækkaði um 40% úr 998 kr./kg. í 1.398 kr./kg. bæði í verslunum Bónuss og Krónunnar og um 8% í Nettó úr 1.198 kr./kg. í 1.298 kr./kg. Merrild kaffi hækkaði um 38% í verslunum Bónuss og Krónunnar og um 35% hjá Nettó. Jonagold epli hafa hækkað um 52% hjá Bónus og Krónunni og 56% hjá Nettó. Avókadó(lárpera) hefur hækkað um 30% hjá Bónus og Nettó og 38% hjá Krónunni

Dæmi um vörur sem hafa lækkað í verði frá því í fyrra er t.d. Haust hafrakex sem lækkaði um 31% hjá Nettó úr 1.324 kr./kg. í 907 kr./kg., 37% hjá Krónunni úr 1.418 kr./kg. í 888 kr./kg. og 18% hjá Bónus úr 1.020 kr./kg. í 833 kr./kg. Einnig hafa sætar kartöflur lækkað um 24% í Nettó, 23% í verslunum Nettó og Bónuss. Einnig má nefna aðrar matvörur sem ekki hafa lækkað jafnmikið í verði eins og stjörnupopp með ostabragði um 2-3% og morgunkornið Cocoa puffs um 1-3%.