Hannes sýknaður af 400 milljóna kröfu Glitnis

Hannes Smárason var sýknaður af 400 milljóna kr. kröfu skilanefndar Glitnis fyrir héraðsdómi í dag og þarf ekki að greiða hana að svo stöddu. Hinsvegar voru FI fjárfestingar, sem áður hétu Primus og er í eigu Hannesar, dæmdar til að greiða Glitni rúmlega 4,6 milljarða kr.

Þegar aðalmeðferð málsins stóð yfir í síðasta mánuði sakaði lögmaður Hannesar skilanefndina um óeðlilega aðför að skjólstæðingi sínum. Lögmaður Glitnis svaraði því aftur á móti að lögsóknin væri lögleg og ekki byggð á neinu samsæri.

Krafan upp á 400 milljónir kr. sem Hannes var sýknaður af var með sjálfskuldarábyrgð hans. Um var að ræða tvö kúlulán upp á 3,5 milljarða en inn í því er sjálfskuldarábyrgð Hannesar auk veðs í húseignum og lóðum, meðal annars á Þingvöllum. Þá voru einnig hlutabréf í FL Group og Byr lögð fram sem tryggingar á sínum tíma. Þess þarf varla að geta að þau bréf eru með öllu verðlaus í dag.

Heildarskuldarstaða FI Fjárfestinga og félaga þar innanborðs gagnvart Glitni, reyndust í það heila nema rúmum tíu milljörðum króna. Glitnir krafðist 4,7 milljarða af FI fjárfestingum.

Málskostnaður Hannesar fellur niður en FI fjárfestingar þurfa að greiða Glitni rúmlega milljón í málskostnað.