Tæplega 600 af 26 þúsund gjaldþrota

Þann 1. október 2011 voru tæplega 26 þúsund einstaklingar í alvarlegum vanskilum. Er þar átt við vanskil sem varað hafa lengur en 90 daga og hafa oftar en ekki farið fyrir dóm samkvæmt upplýsingum frá Credit Info.

Alvarleg vanskil varða í flestum tilvikum kröfur sem eru komnar í milli- eða löginnheimtu og mörg þeirra fengið afgreiðslu dómstóla og sýslumannsembætta.

Í þessari tölu eru einnig þeir sem fengið hafa á sig árangurslaust fjárnám eða lýst sig gjaldþrota.

Af heildarfjölda einstaklinga í alvarlegum vanskilum eru 16.980 einstaklingar skráðir með árangurslaust fjárnám þar sem engar eignir eða ekki nægilegar eignir hafa fundist til að tryggja kröfur.

Árangurslausum fjárnámum fjölgaði verulega á fyrri hluta árs. Hjá sýslumannsembættum hafa mörg aðfararmál líklega verið sett í bið á meðan lánveitendur og lántakendur hafa athugað möguleika á greiðslusamkomulagi og uppgjöri.

Einhver hluti þeirra mála hefur verið leystur með þeim hætti en jafnframt er ljóst að þessi möguleiki er ekki fyrir hendi í mörgum tilvikum og hefur þeim málum verið lokið með árangurslausu fjárnámi.

Af 25.685 einstaklingum hafa 572 verið úrskurðaðir gjaldþrota.