Lýsi byggir nýja verksmiðju við Fiskislóð

Í dag, föstudaginn 10. júní kl. 14:30, verður fyrsta skóflustungan tekin að byggingu nýrrar verksmiðju Lýsis við Fiskislóð. Nýja verksmiðjan verður tæpir 4.000 fermetrar að stærð og í henni búnaður sem tvöfaldar núverandi afkastagetu.

Í tilkynningu segir að eftirspurn eftir afurðum LÝSIS hefur verið mjög góð, en um 90% afurðanna eru seld til annarra landa.  Þar er bæði um neytendavörur að ræða, en að magni til er stærstur hluti útflutningsins magnvara sem seld er til framleiðenda á neytendavöru í öllum byggðum álfum heimsins. 

Eftir vaxandi sölu ár frá ári er nú svo komið að afkastagetan er nær fullnýtt, og fyrirsjáanleg aukning á eftirspurn kallar á aukna framleiðslugetu.  Henni á að mæta með byggingu nýrrar verksmiðju á Fiskislóðinni við hlið núverandi verksmiðju. 

Eins og síðast er það Héðinn sem annast mun hönnun og uppsetningu verksmiðjunnar, Arkþing hannar bygginguna og aðalverktaki er  J.E.Skjanni.

Auk nýju verksmiðjunnar verður skrifstofurými tvöfaldað og rými verður fyrir tanka og vörugeymslu.  Búnaðurinn kemur til landsins í nóvember næstkomandi og hefja tæknimenn Héðins þá uppsetningu, samhliða byggingu hússins. 

Áformað er að þessi nýja viðbót verði tekin í notkun næsta vor og mun afkastageta verksmiðjunnar þá aukast úr yfir 6 þúsund tonnum í um 13 þúsund tonn á ári.  Landsbankinn fjármagnar verkið og verður skrifað undir fjármögnunarsamning í dag kl. 13:00.