Bank of America aðstoðar Icelandic Group

Stjórn Icelandic Group hefur ákveðið að ráða Bank of America Merrill Lynch sem ráðgjafa  við mat á stefnu félagsins og þeim kostum sem félagið hefur í þeim efnum.

Meðal þeirra kosta sem metnir verða er sala eigna úr samstæðunni og möguleikar á sölu á hlut í félaginu. Í fréttatilkynningu frá Icelandic Group segir að stjórn félagsins hafi þann 17. febrúar síðastliðinn óskað eftir tilboðum í fyrirtækjaráðgjöf og var leitað til fjárfestingabanka með þekkingu og reynslu á alþjóðamörkuðum og sjávarútvegi.  Alls skiluðu fimm aðilar inn tilboðum.

Eftir ítarlega yfirferð er það ákvörðun stjórnar að að ráða Bank of America Merrill Lynch sem ráðgjafa, en bankinn hefur starfað með stærstu sjávarútvegsfyrirtækjum á heimsvísu við stefnumörkun og endurskipulagningu eigna.