Segir VBS hafa stundað talnaleiki

Innova varð á meðal fimm umsvifamestu fyrirtækja í byggingageiranum að undangengnum samruna Stafna á milli við tvö önnur verktakafyrirtæki. Starfsmenn voru rúmlega tvö hundruð og veltan í kringum sjö milljarðar króna. Forstjóri fyrirtækisins var Engilbert Runólfsson. Hann sat inni fyrir aðild að fíkniefnainnflutningi fyrir fimmtán árum en varð stórtækur á fasteignamarkaði eftir aldamótin.

Engilbert stýrði Stafna á milli og átti ásamt öðrum hugmyndina að því að kaupa fyrirtækin JB Byggingafélag og Ris árið 2007. Kaupverð JB Bygginga­félags nam á fjórða milljarð króna og lánaði VBS til kaupanna með stuðningi gamla Landsbankans eftir áreiðanleikakönnun KPMG. Viðmælendur Fréttablaðsins segja þetta hafa verið alltof hátt mat. Engilbert segir VBS hafa stýrt ferlinu og sett mark sitt á rekstur Stafna á milli eftir samruna við fyrirtækin. „Það var mat VBS og Landsbankans að verðið væri sanngjarnt. Þeir (VBS) gíruðu þetta allt upp í loft til að láta CAD-reglurnar stemma. Við sáum aldrei krónu af þessu,“ segir hann og bendir á að skuldir Innova hafi hækkað við fyrirtækjakaupin. „Það voru engir peningar á ferðinni heldur talnaleikur hjá VBS,“ segir hann.

Engilbert kannast ekki við eignafærslurnar í ársreikningi Innova í árslok 2007 en segir VBS hafa stýrt þeim. Eignamatið hafi byggt á væntu söluandvirði þeirra fasteigna sem rísa áttu á lóðunum. „Þeir voru alltaf með Fjármálaeftirlitið á bakinu á þessum tíma og redduðu sér með svona gjörningum. En verð á þessum tíma var svona. Menn voru að borga fimmtán milljónir fyrir lóðir undir íbúðir í fjölbýli á þessum tíma. Þetta var orðið algjört brjálæði. Allir í bransanum hefðu þegið þessi bankalán. Menn sáu ekkert fram undan nema að góðærið myndi halda áfram. Allir voru á ballinu en svo voru ljósin slökkt,“ segir hann. „Þetta voru góð verkefni. Ef þau hefðu haldið áfram hefði þetta allt gengið upp.“