Segja yfirlýsingu Arion banka um Pennann ranga

Aðgerðahópur húsgagnasala hafa sent frá sér yfirlýsingu þar sem þeir halda því fram að Arion banki hafi ekki greint rétt frá og að yfirlýsing þeirra um Pennann sé mjög villandi.

Það er okkar mat að yfirlýsing bankans frá því í gær sé röng eða í besta falli mjög villandi enda virðist tilgangur hennar vera sá að leiða umræðuna frá kjarna málsins,“ segir í tilkynningunni en húsgagnasalarnir hafa gagnrýnt Arion banka verulega fyrir að dæla pening inn í Pennann á meðan aðrar verslanir í samkeppni þurfa að horfast í augu við kaldan veruleika efnahagsástandsins.

Húsgagnasalarnir fagna hinsvegar yfirlýsingu Samkeppniseftirlitsins frá því í gær, um að málið sé til skoðunar. „Við munum veita því allar þær upplýsingar sem við getum auk þess sem til skoðunar er að skila inn formlegri kæru,“ segir í tilkynningunni sem má lesa hér fyrir neðan.

Arion leikur sér að tölum

Í yfirlýsingu frá Arionbanka frá í gær kemur fram að bankinn hafði aðeins lagt nýja Pennanum til 100 milljónir króna frá stofnun árið 2009 og að bankinn telji rekstur fyrirtækisins í lagi og að afkoma sé í takti við áætlanir.  Þessar fullyrðingar standast ekki skoðun.

Í ársreikningum Pennans fyrir árin 2009 og 2010, sem við höfum undir höndum, kemur fram allt önnur mynd af rekstri þessa fyrirtækis. EBIDTA Pennans (afkoma fyrir fjármagnsliði og afskriftir) er neikvæð um 24.618.146 krónur á þessum tveimur árum. Jafnframt liggur fyrir að Arionbanki hefur lagt Pennanum til 1.366.412.523 kr. í hlutafé og virðist það hafa verið greitt inn í félagið í þremur hlutum og hefur það fé að sjálfsögðu verið nýtt til rekstrar. Fyrir utan þessi framlög til Pennans, sem við eigum í óvæginni samkeppni við, hefur Arionbanki lánað félaginu umtalsverðar upphæðir á síðustu misserum. Þær upphæðir liggja ekki ljósar fyrir en viðurkennt er að Penninn fékk 500 milljónir króna lánaðar í febrúar 2011. 

Tap Pennans skv. ársreikningum 2009 og 2010 var samtals 1.035.382.907 króna. Slíkt tap þarf að fjármagna – hvaða nöfnum sem menn nefna þá fjármögnun. Hvort það eru fjármagnsliðir, afskriftir eða liðir eins og „endurskipulagning“ sem valda tapinu kemur það á sama stað niður á endanum. Fyrirtæki með slíkt tap þarf að hafa sterkan eiganda og þolinmóðan banka.

Það er okkar mat að yfirlýsing bankans frá því í gær sé röng eða í besta falli mjög villandi enda virðist tilgangur hennar vera sá að leiða umræðuna frá kjarna málsins. Miðað við ofangreint spyrjum við okkur hvort tilmæli Samkeppniseftirlitsins um eðlilegar arðsemiskröfur bankans í þessu tilviki séu uppfylltar. Við hins vegar fögnum yfirlýsingu Samkeppniseftirlitsins frá því í gær um að málið sé til skoðunar. Við munum veita því allar þær upplýsingar sem við getum auk þess sem til skoðunar er að skila inn formlegri kæru.

Kjarni okkar gagnrýni á vinnubrögð Arionbanka varðandi málefni Pennans er að endurskipulagning á fjárhag í raun gjaldþrota fyrirtækis hefur tekið allt of langan tíma. Okkur þykir það óeðlilegt að slíkt fyrirtæki hafi bolmagn til að standa í mikilli markaðssókn, m.a. með því að hrinda af stað auglýsingaherferðum upp á tugi milljóna króna og ráðast í opnun á glæsilegu húsnæði fyrir verslun sína á sama tíma. Við teljum að bankinn sé með innspýtingu á fjármagni í slíkan rekstur að reyna að ná meiri veltu til að gera fyrirtækið söluvænlegra en það ferli, sem spannar langan tíma, kemur auðvitað niður á samkeppnisaðilum.