Erlendar eignir bankanna lækkuðu um 21,6 milljarða

Erlendar eignir íslensku bankanna lækkuðu um 21,6 milljarða króna í september síðast liðnum. Gætir þar ugglaust óróans sem var á erlendum fjármálamörkuðum nær allan þann mánuð.

Í hagtölum Seðlabankans segir að heildareignir innlánsstofnana námu 2.846 milljörðum króna í lok september og eignirnar lækkuðu sem nemur 7 milljörðum kr. frá ágúst. Innlendar eignir námu 2.540 milljörðum kr. og hækkuðu um 14,5 milljarða kr. Erlendar eignir námu 305,9 milljörðum kr. og lækkuðu um 21,6 milljarða kr. frá fyrri mánuði.

Skuldir innlánsstofnana voru 2.358,8 milljarðar kr. í lok september. Þar af voru innlendar skuldir 2.193 milljarðar kr. og höfðu lækkað um 7,2 milljarða kr. frá fyrri mánuði. Erlendar skuldir lækkuðu hins vegar um 2,7 milljarða kr. frá ágúst og námu því 165,5 milljörðum kr. Eigið fé innlánsstofnana nam 487,6 milljarðar kr. í lok september.

Útlán Arion banka hf., Íslandsbanka hf. og NBI hf. eru í þessum tölum metin á kaupvirði þ.e. því virði sem þessir aðilar keyptu útlánasafnið á af fyrirrennurum sínum. Lánasöfnin eru endurmetin reglulega sem getur leitt til hækkunar eða lækkunar á virði einstakra lána. Breytingar á útlánasafni þessara aðila geta því stafað af endurmati á virði lána eða af raunverulegum lánahreyfingum. Seðlabankinn hefur nú samræmt gögn um útlán og niðurfærslur bankanna þriggja sem urðu til í október 2008. Þessi samræming leiðir til þess að höfuðstóll útlána þessara þriggja aðila hækkar, frá fyrri birtingu gagnanna, ásamt framlagi á niðurfærslureikning þeirra.