Fordæma Þorstein fyrir að sýna Ólínu óvirðingu

Sameiginlegur fundur Samfylkingarfélagsins í Reykjavík og Kvennahreyfingar Samfylkingarinnar, samþykkti í gærkvöldi að fordæma Þorstein Má Baldvinsson, forstjóra Samherja, fyrir að sýna Ólínu Þorvarðardóttur, þingmanni Samfylkingarinnar, óvirðingu á fundi um sjávarútvegsmál á Akureyri á þriðjudagskvöldinu.

Að sögn Elfar Logadóttur, formanns Kvennahreyfingar Samfylkingarinnar, þá fóru fram umræður um málið í gærkvöldi og í lok fundarins var samþykt að fordæma framgöngu Þorsteins sem sendi frá sér harðorða ályktun í dag þar sem hann svaraði Sigmundi Erni Rúnarssyni fyrir villandi ranga lýsingu af fundinum. Sigmundur gagnrýndi Þorstein á bloggi sínu í gær og skrifaði:

„Líklega fór Mái einni glæru of langt í fúkyrðaflaumi sínum um andstæðinga kvótakerfisins; sýndi mynd af Ólínu Þorvarðardóttur við hlið ísbjarnargildru og sagði ekkert mark takandi á svona fólki sem kallaði til björgunarsveitir þegar það teldi sig hafa séð þann hvíta … !"

Flokksystur Sigmundar þykja framganga Þorsteins fordæmisverð og segir Elfur að ástæðan sé meðal annars sú að Þorsteinn hafi verið að gjaldfella málflutning Ólínu með því að vísa til þess, að hans mati, að hún hafi gert rangt á einhverjum tímapunkti.

„Svo spyr hann hvort það sé mark takandi á konum sem tala svona," segir Elfur sem þykir framganga Þorsteins ómálefnaleg.

Fundur Kvennahreyfingarinnar í gær er hluti af stærri fundarröð með það að markmiði að Samfylkingarkonur hittist og ræði stöðu kvenna í stjórnmálum. Næsti fundur verður haldinn á Ísafirði næstu helgi.