Pálmi Haralds: Ærleg jólahreingerning hjá Iceland Express

Iceland Express er vel í stakk búið til að mæta þörfum viðskiptavina sinna með nýjum flugvélakosti auk þess sem eigandi félagsins hefur lagt því til 1,3 milljarða króna í reiðufé á síðustu mánuðum til að mæta taprekstri þessa árs. Þetta kemur fram í tilkynningu frá félaginu sem í dag tilkynnti um sölu á tæplega fimm þúsund sætum sem almenningur getur keypt á starfsmannakjörum.  „Félagið ber engar vaxtaberandi skuldir hjá bönkum og lánastofnunum og mætir endurnýjað aukinni samkeppni og verkefnum sínum á komandi árum með  metnaðarfull markmið í farteskinu," segir ennfremur.

Þá segir að Skarphéðinn Berg Steinarsson, sem settist með skömmum fyrirvara í stól forstjóra félagsins í lok september sl., hafi verið ráðinn forstjóri þess til frambúðar. „Þórunn Reynisdóttir var nýlega ráðin sem framkvæmdastjóri yfir nýju sölu- og markaðssviði og Gunnar Petersen hefur verið ráðinn framkvæmdastjóri fjármála."

Hlé gert á Ameríkuflugi til 2013

Sumáráætlun Iceland Express hefur verið endurskoðuð og áfangastöðum fækkað. Ákveðið hefur verið að gera hlé á flugi til Bandaríkjanna fram til vorsins 2013 og ekki verður flogið á milli Akureyrar og Kaupmannahafnar næsta sumar eins og undanfarin fimm ár. Þetta er gert til að auka áreiðanleika og eyða flækjustigi í flugáætlun Iceland Express.

„Það má segja að ný og öflug yfirstjórn félagsins hafi ráðist í rækilega jólahreingerningu á undanförnum vikum," segir Pálmi Haraldsson, eigandi Iceland Express. „Með henni og þessari miklu fjárhagslegu styrkingu er fólgin skýr yfirlýsing um að félagið ætlar sér stóra hluti á komandi árum og áframhaldandi forystuhlutverk í lækkun fargjalda til og frá landinu. Með þessu einstaka desembertilboði kveðjum við erfitt rekstrarár með ferðaveislu sem á sér enga hliðstæðu í íslenskri flugsögu og undirstrikum þann ásetning okkar að standa vörð um forystuhlutverk Iceland Express í lækkun verðs á flugi til og frá landinu."