Tæplega 1800 umsóknir um greiðsluaðlögun óafgreiddar

Embætti Umboðsmanns skuldara á ólokið afgreiðslu á 1.790 umsóknum um greiðsluaðlögun af 3.778 umsóknum sem borist hafa síðan að embættið var stofnað. Þetta kemur fram í svari Guðbjarts Hannessonar velferðarráðherra við fyrirspurn Margrétar Tryggvadóttur, þingmanns Hreyfingarinnar.

Embætti skuldara var stofnað þann 1. ágúst í fyrra og hefur embættið fengið 5.900 mál til afgreiðslu. Þar af eru 990 erindi og ábendingar frá skuldurum, 3.778 umsóknir um greiðsluaðlögun, 1.025 umsóknir um ráðgjöf og 107 umsóknir vegna tímabundins úrræðis fyrir einstaklinga sem eiga tvær fasteignir til heimilisnota.

Að meðaltali hefur embætti umboðsmanns skuldara afgreitt um 157 mál í hverjum mánuði frá stofnun en þar á meðal er fjöldi umsókna um greiðsluaðlögun sem samþykktar hafa verið og sendar áfram til umsjónarmanna.

Að jafnaði hafa embættinu borist um 66 erindi og ábendingar frá skuldurum á mánuði, 234 umsóknir um greiðsluaðlögun, 58 umsóknir um ráðgjöf og sjö umsóknir vegna tímabundins úrræðis fyrir einstaklinga sem eiga tvær fasteignir til heimilisnota. Fjöldi erinda og ábendinga frá skuldurum náði hámarki í mars og apríl á þessu ári vegna óska um að embættið færi yfir endurútreikning lána með ólögmæta gengistryggingu. Þá bárust mjög margar umsóknir um greiðsluaðlögun í júní sem líklega má rekja til þess að ákvæði til bráðabirgða í lögum um greiðsluaðlögun einstaklinga um frestun greiðslna við móttöku umsókna um greiðsluaðlögun féll úr gildi 1. júlí. Eftir þann tíma hafa að meðaltali 33 umsóknir um greiðsluaðlögun borist embættinu á mánuði.