Átján ára samningaviðræðum lokið

Samningum um aðild Rússlands að Alþjóðaviðskiptastofnuninni lauk í morgun eftir átján ára samningagerð. Íslendingur, Stefán Haukur Jóhannesson, hefur leitt viðræðurnar síðustu átta ár. Hann segir að um sé að ræða stórt og sögulegt skref í alþjóðaviðskiptum.

Stefán segir að formleg ákvörðun um aðild Rússa verði tekin á ráðherrafundi Alþjóðaviðskiptastofnunarinnar í desember og þeir muni svo væntanlega fá endanlega aðild um áramótin. Stefán Haukur er ekki sérstakur fulltrúi Íslands í samninganefndinni heldur er hann þar vegna eigin reynslu.

Stefán Haukur segir að samningurinn skipti miklu máli bæði fyrir Rússa og aðildarríki Alþjóðaviðskiptastofnunarinnar. Tollar á vörum muni lækka, meðal annars á þeim fiskafurðum sem Íslendingar flytja til Rússlands.

Stefán Haukur hefur undanfarna mánuði gegnt starfi aðalsamningamanns Íslands í aðildarviðræðum við Evrópusambandið.