Icelandair lækkar enn

Gengi bréfa í Icelandair heldur áfram að lækka, eftir nokkuð skarpa lækkun síðustu daga. Það sem af er degi hefur það lækkað um tæp 2,5% og stendur gengið nú í 5,15. Fyrr í vikunni tilkynnti Framtakssjóður Íslands, stærsti einstaki eigandi Icelandair um sölu á 10% hlut í félaginu á genginu 5,42. Kaupendur hlutsins voru aðallega lífeyrissjóðir, m.a. þeir sömu og eiga Framtakssjóðinn.

Gengi bréfa í Marel og Össuri hefur einnig lækkað en aðeins lítillega þó, eða undir einu prósenti. Gengi bréfa í Össuri er nú 194 og gengi bréfa í Marel 119.

Hægt er að fylgjast með þróun mála á hlutabréfamarkaðnum inn á viðskiptavef Vísis.