Gullverð hækkar látlaust

Gullverð hefur hækkað nánast viðstöðulaust undanfarnar vikur, og það eru orðnar nær daglegar fregnir að það hafi náð methæðum. Gullforði Seðlabankans hækkaði um 1,3 milljarða í verði á örfáum vikum.

Gullverð sló enn eitt metið í dag þegar únsan af gulli seldist fyrir meira en 1780 dollara, andvirði um 206 þúsund króna, en síðan þá hefur verðið aftur lækkað aðeins.

Þessi góðmálmur hefur risið svo mikið í verði vegna þess að fjárfestar líta á gull sem örugga eign sem heldur verðgildi sínu ágætlega og er auðseljanlegt.  Þegar ólga grípur um sig á verðbréfamörkuðum kjósa margir fjárfestar að kaupa gull, og þrýsta þannig verðinu upp.

Þegar markaðir opnuðu í gær í fyrsta sinn eftir að lánshæfismat Bandaríkjanna var lækkað skaust verðið á gulli til dæmis samstundis upp á við. Yfir daginn hækkaði gullverðið um 3,4 prósent og hafði ekki tekið stærra stökk í tvö ár.

Seðlabanki Íslands er vafalaust stærsti eigandi gulls á Íslandi, en bankinn á tæplega 64 þúsund únsur sem geymdar eru í breska seðlabankanum. Þann 18. júlí seldist gullúnsan á 1600 dollara. Það merkir að þegar gullverðið náði hámarki sínu í dag hafði verðmæti gullforða bankans vaxið um meira en 1,3 milljarða króna síðan þá, en það er ávöxtun upp á rúm ellefu prósent á aðeins þremur vikum.