Fjármálaráðuneytið segir aðeins hálfa sögu um Spkef

Árný J. Guðmundsdóttir lögfræðingur segir að fjármálaráðuneytið segi aðeins hálfa söguna hvað varðar lagalegar heimildir ráðuneytisins til að stofna Spkef sparisjóð.  Árný hefur fjallað um málefni Spkef í Viðskiptablaðinu og Morgunblaðinu þar sem fram kom að lagaheimildir hafi skort fyrir stofnun Spkef.

Í gær birtist yfirlýsing frá fjármálaráðuneytinu, þar sem fullyrt er að lagaheimild hafi verið fyrir hendi, þ.e. að samkvæmt „neyðarlögunum“ hafi fjármálaráðuneytinu verið heimilt að stofna fjármálafyrirtæki.

Jafnframt segir að hugtakið fjármálafyrirtæki sé ekki bundið við tiltekið félagaform, en samkvæmt lögum um fjármálafyrirtæki geta fjármálafyrirtæki verið annað hvort hlutafélög eða sparisjóðir.

Árný hefur sent frá sér svar við þessari yfirlýsingu. Þar segir að fjármálaráðuneytið falli í þá gryfju að segja hálfa söguna og vísa aðeins í hluta lagaákvæðis.  Þegar lagaákvæði eru túlkuð verður að líta til þeirra í heild.  Þannig segir í lok ákvæðisins: „Fyrirtæki sem stofnað er samkvæmt þessari grein hefur starfsleyfi sem viðskiptabanki samkvæmt ákvæðum 1. tölul. 1. mgr. 4. gr. laga um fjármálafyrirtæki.“   Viðskiptabankar verða einungis reknir sem hlutafélög.

Síðan segir Árný: „Þannig er ljóst þegar 1. gr. „neyðarlaganna“ er lesin í heild,  að fjármálaráðuneytið gat aðeins stofnað fjármálafyrirtæki með starfsleyfi frá upphafi með því að stofna viðskiptabanka og þar með hlutafélag.  Hefði fjármálaráðuneytið viljað stofna sparisjóð hefði ráðuneytið hins vegar þurft að stofna félag sem hefði orðið að sækja um starfsleyfi sem sparisjóður til FME á hefðbundinn hátt.  Það var ekki gert.

Það er einnig ljóst að fjármálaráðuneytið og FME eru tvísaga um lagagrunn fyrir stofnun og starfsleyfisskyldum rekstri SpKef sparisjóðs.  Þannig staðfesti Gunnar Andesen í samtali við Morgunblaðið þann 5. ágúst sl. að lagaheimild hefði ekki verið til staðar en FME hefði beitt lögjöfnun frá neyðarlögunum.  Engin þörf var að beita lögjöfnun ef fjármálaráðuneytið hefði haft heimild í settum lögum.

Er því ljóst að fjármálaráðuneytið hefur ekki svarað efnislega athugasemdum mínum varðandi skort á heimildum við stofnun og eftirfarandi starfsemi Spkef sparisjóðs.“