Orðrómur um 10 milljarða dollara gróða á lánshæfislækkun

Dularfullur fjárfestir eða vogunarsjóður er sagður hafa hagnast um 10 milljarða dollara, eða um tæplega 1.160 milljarða kr. á því að veðja á að Standard & Poor´s lækkaði topplánshæfiseinkunn Bandaríkjanna. George Soros þykir líklegur sem þessi fjárfestir.

Veðmálið fór fram í gegnum framvirka samninga um viðskipti með tugþúsundir bandarískra ríkisskuldabréfa. Sá sem stóð að því á að hafa lagt fram tæplega milljarð dollara og hefur fengið þá fjárfestingu sína 1.000% til baka.

Í frétt um málið í Daily Mail segir að spurningar hafi vaknað um hvort viðkomandi fjárfestir hafi haft innherjaupplýsingar áður en hann fór í þessa viðskiptafléttu. Af þeim sökum hafa böndin borist að George Soros þar sem hann hefur unnið með stjórn Baracks Obama. Þá er einnig bent á að þegar veðmálinu var lokað seinni hluta síðasta mánaðar hafi Soros tilkynnt um lokun á vogunarsjóði sínum, einkum til að forðast eftirlit frá bandaríska fjármálaeftirlitinu.

Rifjað er upp að það var George Soros sem snýtti Englandsbanka um einn milljarð dollara á degi sem kallað er „svarti miðvikudagurinn“ árið 1992. Þá veðjaði Soros á að bankinn gæti ekki haldið gengi pundsins uppi sem varð raunin.

Heimildir sem standa nálægt Soros neita því að hann hafi staðið í veðmáli um hvort Standard & Poor´s myndi lækka lánshæfiseinkunn Bandaríkjanna eða ekki. Þessar heimildir telja raunar vafasamt að slíkt veðmál sé yfir höfuð staðreynd en ekki bara kjaftasaga.