Landsnet tapaði 133 milljónum á fyrri helmingi ársins

Tap Landsnets hf. samkvæmt rekstrarreikningi nam 133 miljónum kr. fyrir fyrstu 6 mánuði ársins 2011 samanborið við hagnað að fjárhæð 1.034 milljónir kr. fyrir sama tímabil árið 2010.

Þetta kemur fram í tilkynningu til Kauphallarinnar.  Rekstrarhagnaður fyrir fjármagnsliði og afskriftir nam 4.358 milljónum kr. samanborið 4.645 milljónir kr. á sama tímabili fyrra árs og lækkar því um 287 milljónir kr. á milli ára.

Verri afkoma á fyrri helmingi ársins 2011 í samanburði við fyrri helming fyrra árs stafar að mestu af breytingum í fjármagnsliðum og felst aðallega í hærri verðbólgu á fyrstu 6 mánuðum ársins 2011 og meira gengistapi miðað við sama tímabil árið áður.

Hrein fjármagnsgjöld nema samtals 3,3 milljörðum kr. á tímabilinu á móti 2,2 milljörðum kr. á sama tímabili ársins 2010. Hrein fjármagnsgjöld hækka því um 1,1 milljarð kr. á tímabilinu janúar-júní 2011 í samanburði við sama tímabil 2010.

Eiginfjárhlutfall í lok júní var 16,1% samanborið við 16,5% í lok ársins 2010. Heildareignir félagsins í lok júní námu 71,4 milljörðum kr. samanborið við 70,5 milljarða kr. í lok árs 2010. Heildarskuldir námu 59,9 milljörðum kr. samanborið við 58,9 milljarða kr. í lok árs 2010.

Lausafjárstaða félagsins er sterk, í lok júní nam handbært fé 6,5 milljörðum kr.