SA sættir sig ekki við ástandið né horfurnar framundan

Samtök atvinnulífsins sætta sig hvorki við ástand efnahagsmálanna né horfurnar framundan. Spár benda til þess að hagvöxtur verði lítill, framkvæmdir í lágmarki, atvinnu­leysi mikið og að hægt muni ganga að bæta lífskjörin.

Þetta kom fram í ræðu Vilmundar Jósefssonar formanns Samtaka atvinnulífsins á fundi samtakanna um atvinnumál sem nú stendur yfir í Hörpu. Vilmundur segir að samtökin hafa ítrekað sent frá sér tillögur til að ná fram nauðsynlegum efnahagsbata, auka hagvöxt, draga úr atvinnuleysi, minnka brottflutning fólks af landinu og bæta lífskjör. Því miður hafi þær ekki náð fram að ganga og rauða ljósið logi enn á Íslandi.

Fjallað er um málið á vefsíðu SA en þar segir einnig að í gær samþykkti stjórn SA ályktun þar sem mótmælt er nýjum og síhækkandi sköttum sem einungis eru til þess fallnir að draga úr þrótti atvinnulífsins, fresta fjárfestingum og koma í veg fyrir framkvæmdir.