Hlutur í Össuri úr einum vasa í annan

Landsbankinn hefur keypt hlut fjárfestingafélagsins Horns í Össuri, samtals 17,3 milljónir hluta, eða 3,6% af heild. Horn er dótturfélag Landsbankans og því má segja að þessi eignarhlutur í Össuri sé að fara úr einum vasa í annan.

Heildarvirði 17,3 milljón hluta í Össur miðað við markaðsvirði er 3,3 milljarðar króna. Salan er liður í því að skrá Horn á markað en stefnt er á að gera það á næsta ári. Meðal þess sem gert hefur verið, til þess að undirbúa félagið fyrir skráningu, hefur verið að minnka vægi skráðra eigna í eignasafni félagsins.

Horn er fjársterkt félag, sé horft til stöðu félagsins í lok þriðja ársfjórðungs. Félagið var með 32,2 milljarða í eigið fé, skuldir upp á 11,5 milljarða og eignir upp á 43,7. Ýmislegt hefur þó breyst síðan.