Heiðar Már: Þurfum að losna við þessa ónýtu peningastefnu

„Það sem skiptir öllu máli er að losa sig við þessa ónýtu peningastefnu sem Ísland hefur verið að reka,“ segir Heiðar Már Guðjónsson fjárfestir. Heiðar Már skrifaði grein í Fréttablaðið í gær þar sem hann mælir með því að Íslendingar taki upp kanadískan dollar.

Í Reykjavík síðdegis í dag sagði Heiðar Már að hann teldi að þessi kostur væri bestur, en hann útilokaði samt ekki aðra gjaldmiðla. Kanadadollar sé ólíklegastur til þess að rýrna.

Heiðar Már segir að tíminn sé miklir peningar á Íslandi um þessar mundir. „Þetta er mjög aðkallandi vandi og við erum með langhæstu vextina af öllum ríkjum sem eiga við efnahagsvandræði að etja,“ segir Heiðar. Hann segir því ekki eftir neinu að bíða með því að kanna breytingar á gjaldmiðlinum.

Þá tekur Heiðar Már undir orð Martins Wolfs, aðstoðarritstjóra Financial Times, sem sagði á fundi á dögunum að ekki mætti blanda saman aðildarferli að Evrópusambandinu og peningastefnunni. Þetta væri ekki sami hluturinn.