Líklegt að Bretar annist málsvörn fyrir Ísland

Smíðaður hefur verið listi í utanríkisráðuneytinu yfir þær lögmannsstofur sem búa yfir sérfræðiþekkingu í málflutningi fyrir ríki fyrir EFTA-dómstólnum. Að öllum líkindum verður ráðin bresk lögmannsstofa og lögmannskostnaður gæti hlaupið á tugum milljóna króna.

Kristján Andri Stefánsson frá utanríkisráðuneyt, Þóra Hjaltested frá efnahags- og viðskiptaráðuneyti og Jóhannes Karl Sveinsson, hæstaréttarlögmaður, skipa sérstakan ráðgjafarhóp íslenskra stjórnvalda vegna málshöfðunar ESA á hendur íslenska ríkinu fyrir EFTA-dómstólnum, en þau funduðu strax í gær vegna stefnunnar í málinu, sem birt var í gær.

Innan tveggja mánaða þarf íslenska ríkið að skila greinargerð fyrir dómstólnum vegna stefnunnar. Málsmeðferðartími í sambærilegum málum er 6-9 mánuðir, miðað við meðaltal mála sem finna má á vef dómstólsins.

Að sögn Jóhannes Karls Sveinssonar er nokkur málaþungi hjá EFTA-dómstólnum að þessu sinni og því gæti þessi tími orðið eitthvað lengri. Þá geta önnur ríki stefnt sér inni í málið og skilað greinargerðum og því megi reikna með lengri málsmeðferð.

Í stefnu ESA er vitnað sérstaklega til mismununar skv. 4. gr. EES-samningsins. Óvíst er hvaða réttaráhrif það hefur verði niðurstaða dómsins að íslenska ríkið hafi brotið gegn þessari grein samningsins, en ef eitthvað, er það verri niðurstaða en ef málið myndi eingöngu snúast um lágmarkstrygginguna, samkvæmt tilskipun 94/19 um innistæðutryggingar, enda væri mögulega hægt að byggja víðtækari kröfur á mismunun Íslands eftir þjóðerni en lágmarkstryggingu þar sem fjárhæðin er niðurnjörvuð, 20.887 evrur á hvern sparifjáreiganda. 

Samkvæmt upplýsingum fréttastofu flýta menn sér hægt, enda þarf að vanda til verksins. Á næstunni verður ráðin erlend lögmannsstofa til að annast málflutning fyrir íslenska ríkið í málinu, en þá verður einkum horft til reynslu viðkomandi lögmanna af málflutningi fyrir EFTA-dómstólnum. Eftir því sem fréttastofa kemst næst er einkum horft til Lundúna í þessum efnum, en þó er ekki útilokað að ráðin verði stofa frá öðru ríki. Um leið og gengið verður frá ráðningunni verður tilkynnt um hana. Miðað við gríðarlegt umfang málsins má reikna með að lögmannskostnaður íslenska ríkisins muni hlaupa á tugum milljóna króna, að minnsta kosti. thorbjorn@stod2.is