Nýherji hýsir upplýsingakerfi Reita

Reitir fasteignafélag hafa ákveðið að velja Nýherja fyrir rekstur og hýsingu á upplýsingakerfum félagsins. Reitir hafa ennfremur tekið í notkun Rent A Prent prentþjónustu Nýherja sem felur í sér lækkun á árlegum prentkostnaði fyrirtækja.

Í tilkynningu segir að Reitir sé þjónustufyrirtæki á sviði útleigu á atvinnuhúsnæði á Íslandi en félagið hefur yfir að ráða fasteignasafni sem samanstendur af um 130 fasteignum sem staðsettar eru víðsvegar um landið.

Reitir ákváðu að velja rekstrarþjónustu Nýherja í kjölfar verðkönnunar, en þjónustan felur í sér rekstur á upplýsingakerfum, notendabúnaði og miðlægum búnaði.

Reitir völdu ennfremur Rent A Prent þjónustu Nýherja, en þjónustan felur í sér allt að því 25-30% lækkun á árlegum prentkostnaði fyrirtækja. Þá er hægt að fækka prenturum um allt að því 40% með Rent A Prent. Nýherji annast allan prentbúnað, sér um uppsetningu, kennir starfsfólki á tækin og útvegar alla rekstrarvöru, eins og blekhylki og pappír. Í Rent A Prent er einnig fyrirbyggjandi viðhald og viðgerðarþjónusta innifalin en fylgst er með ástandi allra prentara í gegnum vaktþjónustu.

"Hjá Nýherja eru tölvukerfi Reita vistuð í kerfisrými sem hefur öryggisvottun ISO 27001. Við leggjum áherslu á öguð vinnubrögð og vel skilgreindir ferlar eru lykilþættir í að tryggja fumlausan rekstur tölvukerfa viðskiptavina okkar, hagkvæmni og fyrsta flokks þjónustu. Við bjóðum Reiti velkomið í hóp ört stækkandi hóp viðskiptavina í rekstrarþjónustu hjá Nýherja," segir Emil Einarsson framkvæmdastjóri Fyrirtækjasviðs Nýherja.

„Við teljum okkar hag betur borgið með því að útvista eigin tölvukerfi hjá Nýherja í stað þess að annast rekstur þess sjálf. Þannig getum við einbeitt okkur að eigin kjarnastarfsemi á meðan Nýherji annast tölvukerfi okkar," segir Einar Þorsteinsson fjármálastjóri hjá Reitum fasteignafélagi.