Kjarasamningar auka verðbólgu um 2% næstu þrjú árin

Að mati greiningar Arion banka má gróflega áætla að hinir nýju samningar skapi um 2% auka verðbólgu á næstu þremur árum. „Ef við bætum þessum viðbótaráhrifum við verðbólguspá Seðlabankans þá er afar líklegt að verðbólgumarkmið náist ekki á spátímabilinu,“ segir í Markaðspunktum greiningarinnar.

„Eins skringilega að það hljómar, miðað við þann slaka sem er til staðar í hagkerfinu og það háa atvinnuleysi sem enn ríkir á vinnumarkaði, er sú hætta raunverulega fyrir hendi að peningastefnunefnd bregðist við versnandi verðbólguhorfum með vaxtahækkun í nánustu framtíð,“ segir ennfremur.

„Deila má svo um hversu mikil áhrif slík aðgerð hefði á verðbólguhorfur þar sem vaxtahækkun er auðvitað eingöngu til þess fallinn að ýta enn frekar undir samdrátt í hagerfinu og jú draga þar af leiðandi úr hækkandi verðbólguvæntingum!“

Í Markaðspunktunum segir að ef rýnt er í uppfærða verðbólguspá Seðlabankans er ljóst að lítið þarf út af að bregða til að verðbólgan fari á skrið á ný. Í yfirlýsingu peningastefnunefndar eftir síðasta vaxtaákvörðunarfund kemur fram að nefndarmenn hafa áhyggjur af boðuðum launahækkunum í kjarasamningum og að þessar hækkanir samræmist ekki verðbólgumarkmiði til lengri tíma lítið.

Samkvæmt langtímaspá Seðlabankans til ársins 2013 er gert ráð fyrir að verðbólgan verði aðeins yfir eða við markmið bankans sem er 2,5% verðbólga.