Ætla að stefna ríkinu vegna þjóðnýtingar Glitnis

Hópur fólks sem tapaði milljörðum á kaupum hlutabréfa í Glitni vikuna fyrir þjóðnýtingu bankans hyggst stefna ríkinu. Hópurinn segist hafa rændur þar sem ráðamönnum hafi verið grafalvarleg staða bankakerfisins ljós en engu að síður leyft kaup og sölu á hlutabréfum í bankanum.

Hinn 29. september 2008 ákvað íslenska ríkið að leggja Glitni til nýtt hlutafé að upphæð 600 milljónir evra og varð með því eigandi 75% hlutar í bankanum. Þetta var Glitnisleiðin svo kallaða og töldu margir að bankanum hefði þar með verið bjargað.

Geir H. Haarde, þáverandi forsætisráðherra, sagði í útvarpsviðtali síðar sama dag að ekki væri ástæða til að ætla annað en vel myndi ganga hjá Glitni í framtíðinni og ríkissjóður myndi innan tíðar losa sig við hlutabréfin og vonandi hafa af því fjárhagslegan ávinning.

En Glitnir féll, líkt og hinir bankarnir, aðeins um viku síður. Engu að síður var opið fyrir viðskipti með hlutabréf í Glitni hjá Kauphöllinni, þessa örlagaríku viku fyrir hrun.

„Þarna er bara saklaust fólk sem sér kauptækifæri í þessum banka og telur þetta vera orðin tryggasta banka landsins. Það kaupir þarna í góðri trú hlutabréf í bankanum til þess eins að horfa upp á það að ríkið lætur bankann fara á hausinn sjö dögum síðar," segir Guðmundur Jón Matthíasson sem fer fyrir hópi fólks sem hefur í rúmt ár undirbúið að stefna ríkinu fyrir þá ákvörðun að leyfa sölu á bréfum í Glitni þessa viku. Nú er þeirri vinnu lokið og telur Guðmundur að fyrsta stefnan verði lögð fram innan tíðar.

„Hafi ríkt einhver óvissa um framtíð bankans er forkostanlegt að ríkið og stofnanir þess eins og Fjármálaeftirlit og Seðlabanki skuli opna fyrir viðskipti með bréf í bankanum. Hvers á fólkið á götunni að gjalda," spyr Guðmundur.