Dýrt að verjast árásum tölvuþrjóta

Árásir skemmdarvarga í tölvuheimum hleypa upp kostnaði við rekstur þeirra, segir Hilmar V. Pétursson, framkvæmdastjóri CCP, hann segir vel hægt að verjast slíkum árásum en það sé dýrt. Tölvuþrjótar brutust inn í tölvukerfi japanska fyrirtækisins Sega um helgina.

Þrjótarnir stálu persónuupplýsingum um eina komma þrjár milljónir viðskiptavina japanska tölvuleikjaframleiðandans. Upplýsingum um nöfn, fæðingardaga, netföng og lykilorð.

Fjöldi fyrirtækja hefur orðið fyrir barðinu á tölvuþrjótum að undanförnu, ráðist hefur verið á tölvukerfi Sony, Nintendo, bandaríska þingsins, leyniþjónustu Bandaríkjanna CIA, FOX fréttastofunnar, Alþjóðagjaldeyrissjóðsins og spænska ríkislögreglustjórans - auk íslenska fyrirtækisins CCP sem á og rekur tölvuleikinn EVE Online. Tölvukerfi CCP lá niðri í sex klukkustundir vegna þessa í vikunni.

Samkvæmt fregnum erlendra miðla eru það einkum tveir hópar skemmdarvarga í netheimum sem bera ábyrgð á árásunum, Anonymous og Lulz Security, eins og þeir kalla sig.

Hilmar V. Pétursson, framkvæmdastjóri CCP, telur tölvuþrjóta vera að sækja í sig veðrið en árásir hafa magnast umtalsvert síðustu mánuði. „Þetta er framkallað með svokölluðum dotnetum þar sem fólk er búið að komast yfir sýktar tölvur notenda sem það síðan beitir til að framkalla svona árásir."

Spurður hvort tölvuþrjótarnir vinni samkvæmt hugmyndafræði eða um hvort skemmdarvarga sé að ræða svarar Hilmar: „Ég get ekki séð það. Mér sýnist þetta var skemmdarfíkn og skæruliðastarfsemi."

Eitthvað hefur gengið að hafa uppi á skemmdarvörgum. 32 einstaklingar voru handteknir í Tyrklandi í vikunni, samkvæmt BBC, en þeir eru taldir meðlimir í Anonymous. Fyrir níu dögum handtók spænska lögreglan þrjá einstaklinga sem taldir eru í sama hópi tölvuþrjóta. Handtakanna var hefnt með árásum á opinberar vefsíður í Tyrklandi og á Spáni.

Fyrirtæki reyna að verjast árásum sem þessum. Hilmar segir slíkt kosta sitt. „Það er í sjálfu sér ekki flókið en það er kostnaðarsamt."