Áherslubreytingar OR kynntar á opnum ársfundi

Orkuveita Reykjavíkur heldur í fyrsta sinn opinn ársfund, og fer hann fram á morgun milli klukkan 14.00 og 16.00. Ástæða þess að fundurinn er öllum opinn er til að auka gegnsæi í starfseminni og stuðla að upplýstri umræðu um málefni þess. Þess er þó krafist að fólk skrái mætingu á vef Orkuveitunnar.

Á fundinum verða kynntar áherslubreytingar í rekstri, skipulagi og þjónustu OR, drög að nýrri eigendastefnu fyrir fyrirtækið og staða úttektar eigenda á tildrögum fjárhagsvanda fyrirtækisins.

Ársskýrslu Orkuveitu Reykjavíkur fyrir árið 2010 og Umhverfisskýrslu 2010 verður dreift á fundinum á rafrænu formi og verða þær aðgengilegar á vef OR eftir fund.

Fundurinn verður haldinn í höfuðstöðvum Orkuveitu Reykjavíkur.



DAGSKRÁ FUNDARINS:

1. Ávarp Jóns Gnarr, borgarstjóra

Í ávarpi sínu mun borgarstjóri m.a. gera grein fyrir stöðu óháðrar úttektar á stöðu og rekstri Orkuveitu Reykjavíkur, sem hefur það að markmiði að draga fram með skýrum hætti orsakir þeirrar fjárhagslegu stöðu sem fyrirtækið hefur ratað í.

2. Rekstur Orkuveitu Reykjavíkur og horfur, Bjarni Bjarnason, forstjóri

Bjarni, sem tók við forstjórastarfi hjá OR 1. mars síðastliðinn, OR og eigendur fyrirtækisins gerðu með sér samkomulag í marslok um aðgerðaáætlun vegna fárhagsvanda OR sem miðaði m.a. að því að fyrirtækið þyrfti ekki að leita á erlendan fjármagnsmarkað til að tryggja greiðsluhæfi þess.

3. Þjónustufyrirtækið OR, Sigrún Viktorsdóttir, umsjónarmaður þjónustu

Orkuveita Reykjavíkur þjónar um ¾ hlutum landsmanna. Margir eiga því mikið undir því að þjónustan sé traust og að þjónustulund einkenni viðmót fyrirtækisins. Sigrún mun fjalla um aðgerðir hjá OR í þessu skyni.

4. Drög að eigendastefnu OR, Dagur B. Eggertsson, formaður eigendanefndar

Orkuveita Reykjavíkur er í eigu þriggja sveitarfélaga og hafa fulltrúar þeirra unnið að því undanfarna mánuði að setja fyrirtækinu eigendastefnu. Það er nokkuð frumkvöðlaverk því eina slíka skjalið sem til er hjá opinberum aðilum hér á landi er eigendastefna ríkisins gagnvart fjármálafyrirtækjum. Nú liggja drög að eigendastefnunni fyrir og gefst öllum kostur á að koma á framfæri athugasemdum við hana til 15. ágúst næstkomandi.