Á annað hundrað stofnfjáreigenda bíður eftir svörum

Á annað hundrað stofnfjáreigenda í Sparisjóði Húnaþings sem skulda á þriðja milljað króna bíða nú milli vonar og ótta eftir svörum um hvort dómar héraðsdóms í stofnfjármálum í gær, hafi fordæmisgildi í málum þeirra.

Ljóst er að margir horfa til niðurstöðu Héraðsdóms Reykjavíkur í gær í prófmálum Íslandsbanka gegn stofnfjáreigendum í Byr og Sparisjóði Norðurlands. Þar voru stofnfjáreigendur sýknaðir af greiðslukröfu bankans. Í dóminum er Glitnir gagnrýndur fyrir villandi upplýsingagjöf og skeytingarleysi. Hróbjartur Jónatansson lögmaður eins stofnfjáreigandans sem var sýknaður telur dóminn hafa fordæmisgildi.

En það er fjöldi fólks til viðbótar sem er í samskonar sporum og stofnfjáreigendur Byrs og Sparisjóðs Norðurlands voru í. Á bilinu 150 til 200 Stofnfjárhafar í gamla Sparisjóði Húnaþings og Stranda skulda nú samtals á þriðja milljarð króna vegna stofnfjárkaupa í sjóðnum haustið 2007. Algeng skuld á íbúa er 15-25 milljónir króna sem fengnar voru að láni hjá Landsbankanum og Sparisjóði Keflavíkur. Reimar Marteinsson formaður samtaka þeirra stofnfjárhafa segir menn halda í vonina.

„Við horfum frekar jákvæðum augum á þessa dóma en það á eftir að koma í ljós hvort þeir endi svona en í fljótu bragði geta þessir dómar hugsanlega heimfærst yfir á aðra stofnfjárhafa í Sparisjóði Húnaþings. Okkar lögmenn eru að vinna í þessum málum," segir Reimar.

Það virðist sem kynningin á þessum málum sé mjög áþekk innan sparisjóðanna og það er sýnist mér dómarnir vera að setja út á. Að bankarnir hafi ekki sinnt rækilega þeirri upplýsingaskyldu til stofnfjárhafanna.