Fleiri keyptu áfengi í ár en í fyrra

Sala áfengis jókst um 1,2 prósent í júní miðað við sama mánuð í fyrra á föstu verðlagi og um 3 prósent á breytilegu verðlagi. Leiðrétt fyrir árstíðarbundnum þáttum nam samdráttur í veltu áfengis í júní 1,4 prósent frá sama mánuði í fyrra. Verð á áfengi var 1,8 prósent hærra í júní síðastliðnum en í sama mánuði í fyrra.

Þetta kemur fram í greinargerð Rannsóknarseturs verslunarinnar með útreikningi smásöluvísitölunnar, sem stofnunin reiknar og gefur út mánaðarlega.

Þar segir einnig að velta í dagvöruverslun jókst um 3,3 prósent á föstu verðlagi í júní miðað við sama mánuð í fyrra og um 6,7 prósent á breytilegu verðlagi. Leiðrétt fyrir árstíðabundnum þáttum jókst velta dagvöruverslana í júní um 2,2 prósent frá sama mánuði í fyrra. Verð á dagvöru hefur hækkað um 3,3 prósent á síðastliðnum 12 mánuðum.

Fataverslun dróst saman um 6,5 prósent í júní miðað við sama mánuði í fyrra á föstu verðlagi og um 7,1 prósent á breytilegu verðlagi á sama tímabili. Fleiri keyptu skó í júní í ár en í fyrra en velta skóverslunar jókst um 4,7 prósent í júní í ár á föstu verðlagi en verð á skóm lækkaði um 0,3 prósent frá júní í fyrra.

Þá jókst velta húsgagnaverslana um 6,2 prósent á föstu verðlagi en verð á húsgögnum var 5,3 prósent hærra í júní síðastliðnum miðað við júní í fyrra.