Afnám gjaldeyrishafta á einu ári

Vinnuhópur á vegum Viðskiptaráðs hefur lagt fram áætlun um afnám gjaldeyrishafta á einu ári. Lykillinn er útgáfa langtíma ríkisskuldabréfa í erlendri mynt. Gylfi Magnússon segir ekki eðlilegt að halda niðri vöxtum árum saman með því að halda fé í gíslingu hér á landi.

Viðskiptaráð kallaði saman hóp sérfræðinga úr atvinnulífi og háskólum til að stuðla að markvissari umræðu um afnám íslensku gjaldeyrishaftanna á um það bil einu ári, án þess að verulegur þrýstingur verði á gjaldeyrismarkað, en þannig að kostnaði verði haldið í lágmarki.

Megininntak tillögunnar er útgáfa ríkisskuldabréfa í erlendum gjaldmiðlum til tuttugu ára svo aflandskrónueigendur geti farið með sínar eignir úr landi með þeim hætti. Bréfin væru síðan seljanleg á markaði. Útgáfan mun ekki auka skuldsetningu ríkisins þar sem hún verður notuð til þess að greiða upp aðra fjármögnun.

Gylfi Magnússon dósent við viðskiptafræðideild HÍ sat í hópnum og segir það vel raunhæft að afnema höftin að mestu á einu ári. „Það yrðu kannski einhver ákveðin höft á erlenda fjárfesta eftir en þau yrðu að mestu farin á innlenda fjárfesta sem þyrftu þá ekki að hafa áhyggjur af þeim,“ segir Gylfi.

Áætlunin miðar að því að hafa ekki áhrif á gengi krónunnar. „það liggur því miður núna í hlutarins eðli að núna er mikið fé fast á landinu sem heldur niðri vöxtum, svo það er óhjákvæmilegt að vextir myndi hækka sem veldur vandræðum fyrir marga, til dæmis ríkissjóð, þegar að höftin fara en það er ekki hægt að ætla sér að halda niðri vöxtum árum saman með því að halda fé í gíslingi, það er augljóslega ekki eðlileg leið til að fjármagna hvort heldur ríkissjóð eða bankakerfið,“ bætir Gylfi við.

Í hópnum sátu auk Gylfa meðal annars Finnur Oddsson, framkvæmdastjóri Viðskiptaráðs, Orri Hauksson, framkvæmdastjóri samtaka iðnaðarins, Páll Harðarson, forstjóri Kauphallar Íslands og Yngvi Örn Kristinsson hagfræðingur.