Verulega dregur úr taprekstri Reita II

Tap Reita II ehf. (áður Landsafls ehf.) á árinu 2010 nam 627 milljónum króna samanborið við 4.450 milljón króna tap á árinu áður.

Í tilkynningu um uppgjörið kemur fram að heildareignir Reita II námu rúmum 21 milljarði króna þann 31. desember 2010 sem er lækkun um 102 milljón krónur á árinu. Eigið fé félagsins nam 3.222 milljónum króna á sama tíma.

Rekstrartekjur ársins námu 1.632 milljónum króna samanborið við 1.743 milljónir króna á sama tíma árið áður.

Reitir II á og rekur 18 fasteignir á Íslandi og er félagið í 100% eigu Reita fasteignafélags hf.

Í tilkynningunni segir að horfur fyrir árið 2011 eru ágætar en vænta má að rekstur félagsins haldi áfram að vera í járnum.