Greiddu 3 prósent af raunvirði World Class

Dómkvaddur matsmaður sem var fenginn til að meta verðmæti World Class metur reksturinn á átta hundruð til eitt þúsund milljónir króna en Björn Leifsson og kona hans seldu sjálfum sér fyrirtækið á tuttugu og fimm milljónir.

Þrotabú Þreks ehf. sem hélt utan um rekstur World Class höfðaði fyrr á þessu ári mál á hendur Laugum ehf., félagi í eigu Björns Leifssonar og Hafdísar Jónsdóttur konu hans, til að reyna að fá rift sölu á rekstri World Class, en áður en Þrek ehf. fór í þrot árið 2009 seldi félagið reksturinn til annars félags í eigu hjónanna, Lauga ehf. fyrir 25 milljónir króna.

Sigurbjörn Þorbergsson, skiptastjóri þrotabús Þreks ehf., lítur svo á að salan á fyrirtækinu á jafn lágu verði hafi í raun verið hreinn gjafagerningur sem sé riftanlegur á grundvelli laga um gjaldþrotaskipti.

Þrotabúið höfðaði mál til að fá þessu rift og voru tveir dómkvaddir matsmenn fengnir til að meta raunverulegt virði rekstrarins. DV greindi frá því að dómkvaddur matsmaður hefði komist að þeirri niðurstöðu að rekstur World Class væri 800-1000 milljóna króna virði, en matsmennirnir voru í raun tveir.

Sigurbjörn vildi ekki staðfesta þessa fjárhæð við fréttastofuna, en eftir því sem fréttastofa kemst næst er fjárhæðin rétt. Því greiddu hjónin í raun bara 3 prósent af raunvirði World Class þegar þau keyptu reksturinn af eigin félagi áður en það fór í gjaldþrot.

Sigurbjörn Þorbergsson sagði í samtali við fréttastofu í dag að Laugar ehf., stefndi í málinu, hefði lagt fram beiðni um eigið mat á verðmæti rekstrar World Class en hjónin vilja ekki una verðmati hinna dómkvöddu matsmanna.

ALMC, áður Straumur Burðaráss, er stærsti kröfuhafi þrotabús Þreks ehf. Sigurbjörn sagði næstu tíðinda að vænta í næstu viku þegar afstaða verður tekin til matsbeiðnar Lauga ehf. Ef beiðnin verður tekin til greina mun það taka sex vikur að vinna nýtt mat á verðmæti eignanna. Fréttastofan reyndi að ná tali af Birni Leifssyni nú í morgun, án árangurs.