Hvetur Íslendinga til að ryksuga ekki upp allar erlendar verslanir

Það virðist ekki vera hægt að gera stjórnmálamönnum grein fyrir þeim skaða sem vörugjöld gera verslun í landinu, segir Margrét Kristmannsdóttir, formaður Samtaka verslunar og þjónustu. Í samtali við Reykjavík síðdegis í dag ræddi Margrét hvernig stuðla mætti að því að Íslendingar versluðu sem mest innanlands.

„Verslunareigendur eru ekkert á móti því að Íslendingar ferðist. En það sem við höfum talað um er að í fyrsta lagi þurfa stjórnvöld að gera verslun á Íslandi samkeppnishæfa með niðurfellingu t.d vörugjalda. Og númer tvö, þegar fólk fer til útlanda að þá ættu þeir að gera vel við sig í mat og drykk og skoða söfn og kíkja í verslanir. En ekki fara alveg eins og ryksugur frá morgni til kvölds í verslanir og koma heim með fimm til sex töskur hver," segir Margrét.

Margrét segir það ekki vera neitt launungarmál að verslunin stendur ekki vel. Kaupmáttur fólks hefur rýrnað. Verslunarmenn vildu beina versluninni sem mest til Íslands.