AGS með strangt eftirlit á Íslandi eftir að áætlun lýkur

Alþjóðagjaldeyrissjóðurinn (AGS) mun verða með í ráðum við öll helstu skref í afnámi gjaldeyrishafta, og ljóst að aðkoma sjóðsins hér á landi, a.m.k. hvað það varðar, mun standa mun lengur en efnahagsáætlunin sjálf. AGS vill tryggja endurheimtur lána sinna og mun í því sambandi áfram hafa strangt eftirlit með gangi mála hér.

Þetta kemur fram í Morgunkorni greiningar Íslandsbanka þar sem gluggað er í viljayfirlýsingu stjórnvalda vegna fimmtu endurskoðunar á áætlun sjóðsins og Íslands sem samþykkt var fyrir helgina. Í Morgunkorninu segir að í viljayfirlýsingunni komi fram að af sex stofnanaskilyrðum (e. structural benchmarks) sem sett voru í síðustu endurskoðun hefur aðeins eitt náðst, en það snýr að endurskipulagningu og endurfjármögnun smærri fjármálafyrirtækja.

Raunar náðist annað skilyrði, sem snýr að samþykkt áætlunar um afléttingu gjaldeyrishafta, nokkru síðar en áætlað var, en þau fjögur sem eftir standa eru enn óuppfyllt. Þetta virðist þó ekki hafa staðið í AGS-mönnum, og var tímaramminn sem snýr að þessum skilyrðum mestan part rýmkaður nokkuð. Þar er væntanlega horft til þess að sá hluti áætlunarinnar sem snýr að aðlögun opinberra fjármála hefur gengið býsna vel, og að ýmsir aðrir hlutar áætlunarinnar eru í stórum dráttum á áætlun.



„Í viljayfirlýsingunni er mikil áhersla lögð á væntanlega skuldabréfaútgáfu ríkissjóðs erlendis. Er þar sagt að ekki verði ráðist í þá þætti áætlunar um afléttingu gjaldeyrishafta sem falið geti í sér verulegt útflæði gjaldeyris fyrr en slík útgáfa sé í höfn. Í því sambandi má þess geta að við teljum að framangreind útgáfa muni líklega líta dagsins ljós með haustinu að öðru óbreyttu. Þá er því heitið að AGS muni verða með í ráðum við öll helstu skref í afnámi hafta, og ljóst að aðkoma sjóðsins hér á landi, a.m.k. hvað það varðar, mun standa mun lengur en efnahagsáætlunin sjálf,“ segir í Morgunkorninu.

„AGS vill tryggja endurheimtur lána sinna og mun í því sambandi áfram hafa strangt eftirlit með gangi mála hér. Auk þess er á það minnst að þróun nýrrar peningastefnu fyrir Ísland sé nú hafin, og að sú stefna muni m.a. fela í sér kerfisbundin inngrip Seðlabankans á gjaldeyrismarkaði í því skyni að draga úr sveiflum í fjármagnsflæði.

Loks er þar minnst á Icesave-málið, þess getið að stjórnvöld hafi farið fram á það við ESA að væntanlegt mál stofnunarinnar gegn Íslandi fyrir EFTA-dómstólnum verði látið niður falla en því hins vegar heitið að Ísland muni standa við þær skuldbindingar sem til þess bær dómstóll kunni að dæma að staðið skuli við vegna málsins.“