Afskriftaþörf Íbúðalánasjóðs enn óljós

Fram er komið frumvarp sem veitir Íbúðalánasjóði heimild til að færa niður veðkröfur á hendur einstaklingum í 110 prósent af verðmæti fasteignar. Með því er sjóðnum veitt nauðsynleg lagastoð til að taka þátt í aðgerðum stjórnvalda vegna skulda- og greiðsluvanda heimilanna.

Drög að samkomulagi stjórnvalda og fjármálastofnana um aðgerðir voru undirrituð í byrjun desember á síðasta ári og verklagsreglur ákveðnar um miðjan janúar. Þá var ekki talin þörf á að breyta lögum um Íbúðalánasjóð. Síðar kom í ljós að slíkrar breytingar þyrfti við.

Frumvarpinu fylgja löng greinargerð og fylgiskjal frá fjárlagaskrifstofu fjármálaráðuneytisins. Í þeim er meðal annars fjallað um afskriftaþörf Íbúðalánasjóðs, margar tölur nefndar í því sambandi og ýmsir fyrirvarar gerðir.

Í greinargerðinni segir að kostnaður við niðurfærslu sjóðsins vegna aðgerðanna sé áætlaður tæpir 22 milljarðar en í áætlunum sjóðsins sjálfs komi fram að líklega kunni kostnaðurinn að verða lægri, jafnvel fimmtán milljarðar.

Í umsögn fjármálaráðuneytisins segir að Íbúðalánasjóður áætli að afskriftaþörf vegna frumvarpsins geti að hámarki orðið um 27 milljarðar. Segir jafnframt að endanlegar tölur um afskriftir vegna þessa úrræðis muni ekki liggja fyrir fyrr en seint á árinu.- bþs