Nýtt mat lækkar arðgreiðslu hjá SS

Fram er komið nýtt mat á hámarks arðgreiðslu sem eigendur yfir 10% hluta í B-deild stofnsjóðs Sláturfélags Suðurlands (SS) geta krafist. Matið lækkar arðgreiðsluna um tæpar 2 milljónir kr.

Í tilkynningu um málið segir að samkvæmt matinu sem unnið er af Deloitte hf. er ekki heimilt að ráðstafa til eigenda B-deildar stofnsjóðs hærri fjárhæð en  12.403.500 kr.  verði tillaga eigenda yfir 10% hluta í B-deild stofnsjóðs samþykkt á aðalfundi félagsins 25. mars 2011.

Stjórn Sláturfélags Suðurlands  hefur móttekið kröfu um útgreiðslu arðs af eigendum yfir 10% hluta í B-deild stofnsjóðs. Krafan er móttekin innan tilskilins frests samkvæmt samþykktum félagsins.

Hámarks arðgreiðsla getur þó ekki orðið hærri en kr. 12.403.500,- samkvæmt nýju mati sem unnið var af skatta- og endurskoðunarsviði Deloitte hf. Áður var talið að heimilt væri að ráðstafa kr. 14.343.824,- samanber tilkynningu félagsins til Kauphallar 11. mars s.l.

Eins og áður hefur komið fram verður krafan um útgreiðslu arðs því lögð fram sem tillaga fyrir aðalfund félagsins sem haldinn verður 25. mars 2011.

Verði tillagan samþykkt á aðalfundi félagsins gæti arðgreiðslan orðið að hámarki 6,2%, alls 12.403.500 krónur.  Arðleysisdagur er þá 28. mars, arðréttindadagur 30. mars og greiðsludagur arðs 29. apríl 2011.