Vettel: Erfitt að meta styrkleika keppinautanna

Formúlu 1 heimsmeistarinn Sebastian Vettel hjá Red Bull telur að erfitt sé að meta hvernig hann stendur gagnvart keppinautum sínum. Hann keppir í fyrsta Formúlu 1 móti ársins í Ástralíu á sunnudaginn.

"Það er óvissa að vita hvernig maður stendur miðað við aðra. Sú staða hefur aldrei verið til staðar", sagði Vettel í frétt á autosport.com í dag.

Margir óvissuþættir eru í Formúlu 1 í ár og ekki síst útaf nýjum dekkjum frá Pirelli sem eiga að slitna hraðar og gætu kostað það að keppnislið verða að taka fleiri þjónustuhlé í mótum. Formúlu 1 keppnislið æfðu á brautum á Spáni í vetur og ökumenn skiptust á að ná besta tíma.

"Við þurfum ekki að vera í óvissu með okkar lið. Við vitum hvað við höfum gert og við ættum að vera í góðum málum. Núna er bara málið að sjá hvar við stöndum gagnvart öðrum", sagði Vettel.

Vettel sagði þetta á kynningu í Ástralíu, þar sem hann var látinn prófa að rýja rollu og stjórna fjárhundi, til að kynnast áströlsku sveitalífi. Vettel var frekar áhyggjufullur að meiða dýr við rúningu, en verður hvergi banginn í mótinu um helgina.

"Ég verð ekki eins feiminn og í dag, því ég veit hvað ég ætla að gera", aðspurður um væntanlegt mót.

"Við áttum góðan vetur og höfum ekið mikið. Við lentum ekki í neinum verulegum vandræðum með bílinn, bara smávægilegum, ekkert stórkostlegum. Þetta er besti veturinn til þessa. Það er hinsvegar erfiðara að segja hvar við stöndum gangvart öðrum."

"Það eru allir með nýja hluti á bílum sínum, það eru nýjar reglur og ný dekk. Það er erfitt að finna það út hvar maður er staddur. Til þess komum við hingað og sjáum það í síðasta lagi á laugardaginn."

Sem ríkjandi heimsmeistari er Vettel með rásnúmer 1 á bíl sínum á þessu ári.

"Við byrjum allir á núlli og ég hef núll stig líka, eins og aðrir. Það kann að vera að það sé rásnúmer eitt á bílnum, en það þýðir ekki að ég sé fljótari í ár. Ég þarf að vinna af krafti og kreista allt út úr bílnum, til að vera viss um að vera í fremstu röð", sagði Vettel.