Hættur að rannsaka Kaupþing

Mick Randall, yfirmaður hjá efnahagsbrotadeild bresku lögreglunnar, SFO, sem stýrir rannsókninni á hruni Kaupþings hefur sagt upp störfum. Þetta kemur fram á fréttavef Financial Times. Einungis tvær vikur eru síðan Randall stýrði handtökum á bræðrunum Robert og Vincent Tchenguiz og fimm öðrum mönnum í Bretlandi í þágu rannsóknar málsins.

Financial Times, segir að samkvæmt upplýsingum frá SFO hafi legið fyrir í allnokkurn tíma að Randall ætlaði að yfirgefa stofnunina og hverfa til starfa í einkageiranum. Hins vegar vildu talsmenn SFO ekki gefa upplýsingar um það hvort hann væri þegar kominn með starf.

Financial Times segir líka að fjárframlög til SFO hafi minnkað að undanförnu og sex mikilvægir starfsmenn hafi farið til starfa í bönkum og á lögfræðiskrifstofum. Þá sé einnig óvíst um framhald á starfsemi SFO vegna þess að hugleiðingar séu um að stofnunin verði færð inn í nýja efnahagsbrotastofnun sem til standi að stofna.