Landsvirkjun semur um 24 milljarða króna lán

Landsvirkjun hefur skrifað undir sambankalán á alþjóðlegum bankamarkaði. Þetta er fyrsti samningur af þessu tagi sem íslenskt opinbert fyrirtæki gerir síðan í október 2008.

Lánið er fjölmynta veltilán til þriggja ára að fjárhæð 200 milljónir Bandaríkjadala, eða sem samsvarar rúmum 24 milljörðum íslenskra króna. Landsvirkjun getur dregið á lánið og endurgreitt eftir þörfum. Lánið er með framlengingarheimild um tvö ár og getur lánstími því að hámarki orðið fimm ár.

Með lántökunni hefur Landsvirkjun lokið við endurfjármögnun samskonar láns sem er á gjalddaga í desember 2012. Um lántökuna sáu Barclays Capital, Citigroup og SEB. Aðrir bankar í láninu eru Arion Banki, JP Morgan, UBS, Landsbankinn og Íslandsbanki.

Í fréttatilkynningu frá Landsvirkjun segir að markmið lántökunnar sé að Landsvirkjun hafi ávallt tryggan aðgang að fyrirvaralausri fjármögnun ef hefðbundnar fjármögnunarleiðir lokast tímabundið.