Borgarstjórn samþykkti 300 milljóna króna lán til Austurhafnar

Borgarstjórn Reykjavíkur samþykkti í dag að veita Austurhöfn-TR, rekstraraðila Hörpunnar, um 300 milljóna króna lán þangað til að tekist hefði að endurfjármagna verkið.

Tillagan var samþykkt með átta atkvæðum Besta flokksins og Samfylkingarinnar. Sjálfstæðismenn sátu allir hjá, nema Kjartan Magnússon borgarfulltrúi, sem greiddi atkvæði gegn tillögunni. Kjartan telur að með sé verið að flækja ríki og borg enn í fjármögnun verkefnisins, en árið 2009 hafði því verið lofað að opinberir aðilar þyrftu ekki að styðja frekar við verkefnið.

Þá var greint frá því í dag hér á Vísi að meirihluti fjárlaganefndar Alþingis hefði lagt fram breytingatillögu við fjáraukalagafrumvarp fyrir þetta ár um að ríkið lánaði Austurhöfn-TR, sem rekur Hörpuna, 400 milljónir króna þangað til samið hefur verið um langtímafjármögnun á húsinu. Ríkið hefur þegar ákveðið lánveitinguna en sú ákvörðun er háð samþykkt Alþingis í fjáraukalögunum.

Eins og Fréttablaðið greindi frá í síðustu viku nemur sameiginlegt lán ríkis og borgar til Austurhafnar-TR vegna verkefnisins samtals 730 milljónum króna.