Fjárlaganefnd lagði fram tillögu um lán til Austurhafnar

Meirihluti fjárlaganefndar Alþingis hefur lagt fram breytingatillögu við fjáraukalagafrumvarp fyrir þetta ár um að Austurhöfn-TR, sem rekur Hörpuna, fái lánaðar 400 milljónir króna þangað til samið hefur verið um langtímafjármögnun á húsinu. Breytingartillagan var lögð fram í dag.

Fréttablaðið greindi frá því í síðustu viku að íslenska ríkið og Reykjavíkurborg hefðu samþykkt að lána 730 milljónir króna til Austurhafnar-TR, eiganda tónlistar- og ráðstefnuhússins Hörpu. Lánin eru í hlutfallslegu samhengi við eign ríkis og borgar í Austurhöfn en það er í  54% eigu íslenska ríkisins og 46% eigu Reykjavíkurborgar.

Samkvæmt heimildum Fréttablaðsins ber lánið sem Austurhöfn fær frá ríki og borg 7% fasta vexti.