FME: Exista fær 15 milljóna stjónvaldssekt

Fjármálaeftirlitið hefur ákveðið að beita Exista 15 milljón króna stjórnvaldssekt fyrir brot gegn lögum um verðbréfaviðskipti.

Í úrskurði Fjármálaeftirlitsins segir að við ákvörðun fjárhæðar var tekið mið af alvarleika brotsins, þar á meðal hversu margþætt það var og hve gróft brot á upplýsingaskyldu útgefanda á skipulögðum markaði var um að ræða.

Kauphöllin vísaði málinu til Fjármálaeftirlitsins en það snýst sölu Exista á tæplega 40% eignarhlut félagsins í Bakkavör árið 2009 fyrir 8,4 milljarða króna. Hluturinn var seldur til eignarhaldsfélags í eigu Lýðs og Ágústs Guðmundssonar oft auknefnda Bakkabræður, og fengu þeir lán frá Exista fyrir kaupunum með veði í hlutbréfunum.

Þessi viðskipti voru ekki tilkynnt til Kauphallarinnar sem taldi þau heyra undir upplýsingasskyldu félaga enda um augljósar innherjaupplýsingar að ræða. Þessu hafnaði Exista en Fjármálaeftirlitið tekur undir rökstuðning Kauphallarinnar.